Mae Anna yn Hyrwyddwr Achub Moroedd gydag Ymddiriedolaeth Natur Gogledd Cymru. Mae hi’n llysgennad dros forwellt ac mae wedi cymryd rhan mewn casglu a phlannu hadau, ac wedi siarad â gwleidyddion hefyd!
Ym mis Gorffennaf, Anna oedd cyd-enillydd gwobr arbennig iawn. Mae Gwobr Gwirfoddolwr Ifanc y Gors ar gyfer Cadwraeth Forol yn dathlu gwaith anhygoel gwirfoddolwyr yr Ymddiriedolaeth Natur sy’n gwarchod ein moroedd ni.
Beth am i ni glywed mwy gan Anna…
Anna Williams © North Wales Wildlife Trust
Anna, llongyfarchiadau ar dy fuddugoliaeth! Pam wnes di benderfynu gwirfoddoli gyda’r grŵp Hyrwyddwyr Achub Moroedd?
Roeddwn i wedi gwirfoddoli gydag Ymddiriedolaeth Natur Gogledd Cymru ar gyfer y prosiect achub moroedd morwellt yn 2021 ac wedi bod yn eu dilyn nhw ar y cyfryngau cymdeithasol ers hynny. Fe welais i neges yn hysbysebu rhaglen Hyrwyddwyr Achub Moroedd ac roeddwn i'n meddwl ei bod yn swnio'n unigryw ac yn gyffrous iawn ac felly fe wnes i benderfynu gwneud cais.
Beth wyt ti'n ei fwynhau fwyaf am wirfoddoli?
Fy hoff ran i am wirfoddoli yw'r holl gyfleoedd anhygoel rydw i wedi'u cael - o snorcelu dros ddolydd morwellt i gyfarfod â dirprwy brif weinidog Cymru yn y Senedd. Mae'r holl brofiadau yma wedi bod yn anhygoel ac rydw i wedi eu mwynhau nhw'n fawr iawn. Elfen arall o wirfoddoli rydw i wrth fy modd â hi ydi cael cwrdd â chymaint o bobl ddiddorol, sydd wedi cael profiadau mor wych. Rydw i wrth fy modd yn dysgu gan bobl sy'n arbenigwyr yn y maes rydw i eisiau mynd iddo yn y dyfodol.
Sut wyt ti’n meddwl wyt ti wedi elwa o wirfoddoli?
Mae gwirfoddoli wedi fy helpu i mewn cymaint o ffyrdd. Nid yn unig y mae wedi fy helpu i benderfynu pa bwnc i'w ddilyn yn y brifysgol, ond mae hefyd wedi fy helpu i ennill sgiliau hanfodol eraill, fel cyfathrebu a gwaith tîm. Cyn i mi ddechrau gwirfoddoli gydag Ymddiriedolaeth Natur Gogledd Cymru, roeddwn i'n dawel ac yn swil iawn, ond nawr rydw i wrth fy modd yn siarad â'r cyhoedd am fywyd morol mewn digwyddiadau, ac rydw i wedi cael y cyfle i siarad â gwleidyddion hyd yn oed am fy angerdd i dros ein hamgylchedd morol ni.
Beth fyddet ti'n ei ddweud wrth bobl ifanc eraill sy'n ystyried gwirfoddoli?
Fe fyddwn i'n dweud wrth bobl ifanc eraill y dylen nhw bendant gymryd rhan mewn gwirfoddoli! Mae'n ffordd anhygoel o ddatblygu sgiliau a hyder, ac mae'n deimlad gwych gwybod eich bod chi’n cael effaith gadarnhaol. Mae hefyd yn gyfle gwych i gwrdd â phobl sydd â'r un diddordebau â chi.
Pam mae natur yn bwysig i ti?
Rydw i wedi mwynhau bod allan ym myd natur – yn enwedig bod ar y traeth – ers pan oeddwn i’n ifanc iawn. Roeddwn i wrth fy modd bod rhywbeth cyffrous i’w weld ym myd natur bob amser, boed yn bysgod, pryfed neu blanhigion.
Wrth i mi fynd yn hŷn, rydw i wedi dod i werthfawrogi byd natur a bywyd gwyllt fwy fyth. Rydw i wrth fy modd bod cymaint o greaduriaid deallus ym myd natur sy'n ymddwyn mewn ffyrdd mor ddiddorol, ac rydw i wrth fy modd yn arsylwi'r ymddygiadau yma.
Mae gweld cymaint o amrywiaeth wrth fod allan ym myd natur yn fy atgoffa i o ba mor bwysig yw ein bod ni'n codi ymwybyddiaeth am newid hinsawdd ac yn gwneud ein rhan i helpu i warchod y blaned.
Beth yw dy obeithion di ar gyfer y dyfodol? Beth sydd nesaf i ti?
Y flwyddyn nesaf, fe fydda’ i’n mynd i’r brifysgol i astudio bioleg forol – rhywbeth y mae gwirfoddoli gydag Ymddiriedolaeth Natur Gogledd Cymru wedi dylanwadu’n fawr arno. Rydw i’n gobeithio dal ati i wirfoddoli cymaint ag y gallaf i wrth astudio. Yn y dyfodol, rydw i’n gobeithio dal ati gyda gwaith cadwraeth fel achub moroedd morwellt, gan ei fod yn rhoi cymaint o foddhad i mi.
Matthew Roberts
Dewch o hyd i ddigwyddiadau a grwpiau i gymryd rhan ynddyn nhw ar garreg eich drws
